सदोष मन 🌈❤️

कुरुक्षेत्राच्या रणांगणावर कौरव आणि पांडवांची प्रचंड सैन्ये आमनेसामने उभी ठाकली होती. युद्धाचा क्षण अगदी समीप आला होता.

अर्जुन शस्त्रानिशी सज्ज होता. युद्ध सुरू झाल्यानंतर अधर्मी कौरवांचा पराभव आणि धर्माच्या बाजूने उभ्या असलेल्या पांडवांचा विजय निश्चित होता.

परंतु अचानक अर्जुन रथातून खाली उतरला आणि श्रीकृष्णाला म्हणाला, “मी हे युद्ध करू शकत नाही.”

अर्जुनाच्या मनाला महामोहमायेचा दंश झाला होता. स्वकीयांविषयी जागृत झालेली माया, प्रेम आणि आपुलकी यांमुळे त्याचे मन विचलित झाले. त्या क्षणिक मोहाने त्याला स्वतःचा क्षत्रियधर्म विसरायला लावला. स्वकीयांविषयी निर्माण झालेल्या भावनांनी त्याचे कर्तव्य झाकोळून टाकले आणि त्याला युद्धापासून परावृत्त करण्याचा प्रयत्न केला.

मित्रांनो, आपल्या प्रत्येकाच्या मनात असे दोष असतात किंवा परिस्थितीनुसार नव्याने निर्माण होत असतात. एखाद्या गोष्टीबद्दलची आपली समज, आकलन आणि दृष्टिकोन यांमधून भावना निर्माण होतात. त्या भावनांवर आपली वृत्ती घडते आणि त्या वृत्तीच्या आधारे आपण कृती करतो. परंतु जर त्या भावना किंवा समज चुकीच्या असतील, तर आपल्या कृतीही चुकीच्या ठरतात. परिणामी अपेक्षित यश मिळत नाही.

असं का होतं?

कारण कृती करण्यापूर्वी आपलं मनच सदोष असतं. आपल्या मनात निर्माण झालेल्या चुकीच्या समजुती, अपूर्ण आकलन आणि भ्रमित भावना आपल्या निर्णयांवर परिणाम करतात.

आपल्या मनातील हे दोष दूर कसे करायचे?

ज्याप्रमाणे अर्जुनाच्या मनात युद्धाविषयी निर्माण झालेला मोह, संभ्रम आणि चुकीची समज श्रीकृष्णाने दूर केली, त्याच्या विचारांना योग्य दिशा दिली आणि त्याला त्याच्या कर्तव्याची जाणीव करून दिली, त्यानंतरच अर्जुन पुन्हा आत्मविश्वासाने युद्धासाठी उभा राहिला.

आता प्रश्न असा आहे की, मला आणि तुम्हाला आपल्या मनातील दोष दाखवणारा, आपली चूक प्रेमाने सांगणारा आणि योग्य मार्ग दाखवणारा श्रीकृष्ण भेटला आहे का?

प्रकटीकरणाच्या प्रवासात कोणतीही कृती करण्यापूर्वी आपण आपल्या मनातील भावना, त्या गोष्टीबद्दलची समज आणि आपली आकलनक्षमता तपासून पाहिली पाहिजे. त्यासाठी आपल्या आयुष्यात श्रीकृष्णासारखा जिवलग, प्रामाणिक आणि हितचिंतक मित्र असणं अत्यंत आवश्यक आहे.

कारण खरा मित्रच आपल्या मनातील दोष ओळखू शकतो. तो आपल्याला आरसा दाखवतो, चुकीच्या समजुती दूर करतो, योग्य विचार करायला शिकवतो आणि कृती करण्यापूर्वी योग्य दिशा दाखवतो.

म्हणूनच आज प्रत्येकाने स्वतःला एक प्रश्न विचारावा—

“माझ्या आयुष्यात मला श्रीकृष्णासारखा असा जिवलग मित्र भेटला आहे का?”

आणि जर उत्तर “नाही” असेल, तर निराश होण्याचं कारण नाही.

कारण श्रीकृष्ण आजही आपल्या सोबत आहेत. फरक इतकाच की, ते आज रथावर बसून बोलत नाहीत; ते भगवद्गीतेच्या प्रत्येक श्लोकातून आणि ज्ञानेश्वरीच्या प्रत्येक ओवीतून आपल्याशी संवाद साधत आहेत.

अर्जुनाच्या मनातील मोह, संभ्रम आणि अज्ञान जसं श्रीकृष्णाने दूर केलं, तसंच ज्ञानेश्वरीचं चिंतन आपल्या मनातील चुकीच्या समजुती, भ्रम, भीती आणि न्यूनगंड हळूहळू दूर करतं. आपल्या विचारांना शुद्ध करतं, विवेक जागृत करतं आणि योग्य कृतीची दिशा दाखवतं.

मित्रांनो, प्रकटीकरणाची सुरुवात बाह्य जग बदलण्यापासून होत नाही; ती आपल्या मनातील दोष दूर करण्यापासून होते. मन शुद्ध झालं, विचार स्पष्ट झाले आणि कृती धर्माशी जोडली गेली, तर यश हे केवळ शक्यता राहत नाही, तर ते नैसर्गिक परिणाम बनतं.

म्हणूनच, आपल्या जीवनात श्रीकृष्ण शोधायचा असेल, तर भगवद्गीता वाचा आणि श्रीकृष्णाचं प्रेमळ, सोपं आणि अनुभूतीपूर्ण मार्गदर्शन अनुभवायचं असेल, तर ज्ञानेश्वरी वाचा. चालत रहा🌈❤️🏃‍♂️

वैभव कवडे 

चालत रहा🏃‍♂️

+ 91 9975100120